Blíða trónir enn á toppnum

Niðurstöður afurðaskýrslnanna í nautgriparæktinni við lok ágúst 2012, hafa verið reiknaðar og birtar á nautgriparæktarsíðunum á vef BÍ. Þegar yfirlitið var búið til, á miðnætti hinn 10. september, höfðu borist skýrslur frá 93% þeirra 595 búa sem skráð eru í skýrsluhaldið.
Helstu niðurstöðurnar eru þær að 21.891,8 árskýr mjólkuðu að meðaltali 5.633 kg sl. 12 mánuði, sem er 9 kg hærri nyt en reiknaðist í síðasta uppgjöri. Hæsta meðalnytin við lok júlí var á Hóli í Sæmundarhlíð í Skagafirði 7.884 kg eftir árskú en þar voru einnig hæstar meðalafurðir í mánuðinum á undan. Næst á eftir kom búið á Hraunhálsi í Helgafellssveit á Snæfellsnesi en þar var nytin 7.666 kg en það bú var einnig nr. 2 síðasta mánuði. Þriðja búið á listanum var í Miðdal í Kjós en þar voru meðalafurðirnar 7.730 kg eftir árskú, en það bú var einnig í þriðja sæti í síðasta mánuði þannig að nú hefur röð þriggja hæstu búanna ekki breyst frá uppgjörinu á undan.

Blíða trónir enn á toppnum
Á 22 búum fór meðalnytin yfir 7.000 kg eftir árskú en á 21 búi í mánuðinum á undan. Nythæsta kýrin á síðustu 12 mánuðum var hin sama og næstu sjö mánuði á undan, Blíða nr. 1151 í Flatey á Mýrum, A-Skaft., nyt hennar síðastliðna 12 mánuði var 14.276 kg. Önnur kýrin í röðinni yfir nythæstu kýrnar síðastliðna 12 mánuði var einnig kýr í Flatey, Laufa nr. 1089, en hún mjólkaði 12.794 kg og var í þriðja sæti á þessum lista í júlí. Hin þriðja á þessum lista í ágústlok 2012 var Vitra nr. 622 í Reykjahlíð á Skeiðum í Árnessýslu. Hún mjólkaði 12.326 kg sl. 12 mánuði. Alls náðu 16 skýrslufærðar kýr að fara yfir 11.000 kg á síðustu 12 mánuðum, jafn margar og í júlí. Af þeim mjólkuðu 5 yfir 12.000 kg og þar af ein sem náði að fara yfir 14.000 kg og hljóta það að teljast tíðindi.

Sjá nánar:
Niðurstöður skýrsluhalds nautgriparæktarinnar