Fóðurblandan hefur birt áburðarvöruskrá og -verðskrá fyrir árið 2011. Fyrirtækið býður upp á sömu áburðartegundir og í fyrra auk þess sem bætt hefur verið við Magna S með efnainnihaldi 27% köfnunarefni (N). Nánast allar tegundir hækka um 13,7% milli ára ef 10% pöntunar- og staðgreiðsluafsláttur er nýttur. Þó hækkar Fjölgræðir 7 með efnainnihaldinu 22-14-9 um 17,3%. Fyrirtækið býður viðskiptamönnum sínum sem panta fyrir 15. mars n.k. upp á vaxtalausa greiðslusamninga gegn tryggingum og flutningstilboði heim á hlað. Annars vegar má velja um greiðslusamning með gjalddaga 1. október eða sex jafnar greiðslur frá júní til nóvember. Enginn lántökukostnaður né stimpilgjöld leggjast á samningana.

Aðalfundur Kornræktarfélags Austur–Skaftfellinga var haldinn að Smyrlabjörgum í Suðursveit 10. febrúar síðastliðinn. Félagið var stofnað 4. febrúar 1997 og er tilgangur þess að vera hagsmunafélag kornbænda í Austur–Skaftafellssýslu. Fundurinn var vel sóttur og mættu 40 manns, bændur, sveitarstjórnarmenn og annað áhugafólk um jarðrækt.
Á aðalfundinum voru samþykktar breytingar á lögum félagsins sem miða að því að gera félagið að hagsmuna- og áhugamannafélagi um jarðrækt í Austur–Skaftafellssýslu. Til að ná því markmiði voru samþykktar breytingar sem m.a. fólu í sér neðangreind atriði. Í fyrsta lagi að starfsemi félagsins einskorðist ekki lengur við kornrækt heldur jarðrækt almennt í Austur–Skaftafellsýslu.

Í Morgunblaðinu í dag er fjallað um það að ræktun vetrarrepju til framleiðslu á endurnýjanlegum orkugjafa er talin einfaldasta og líklega eina raunhæfa framtíðarlausn á eldsneyti fyrir dísilvélar bifreiða og skipa hér á landi. Unnið hefur verið að tilraunum við ræktun og framleiðslu hér á landi og mikill áhugi virðist vera hjá bændum. Með vetrarrepju í þessu sambandi er átt við repju sem uppskorin er ári eftir sáningu.

Fimmtudaginn 3. mars n.k. verður haldinn nautgriparæktarfundur á vegum Búnaðarsambands Suðurlands og Bændasamtaka Íslands í Árhúsum á Hellu. Fundurinn hefst kl. 13.30. Á fundinum verður m.a. fjallað um niðurstöður skýrsluhaldsins á árinu 2010, nautahaldið og nautgriparækt almennt. Þá verða veittar viðurkenningar fyrir afurðahæstu búin og kýrnar á s.l. ári sem og bestu naut úr nautaárgöngum 2002 og 2003.

Sláturhúsið Hellu hefur tilkynnt um hækkun á verði nautgripakjöts til bænda frá og með mánudeginum 14. febrúar n.k. Um er að ræða hækkun á öllum verðflokkum ungneyta- og kýrkjöts. Hækkunin nemur 20 kr/kg í öllum flokkum nema hvað KIUA og KIA hækka 25 kr/kg og KIUB, KIB, UNIÚ A og B undir 210 kg hækka um 30 kr/kg. Hækkunin er á bilinu 3,4-7,5%.

Fóðurblandan hf. hefur tilkynnt um 5-10% verðhækkun á öllu tilbúnu fóðri miðvikudaginn 16. febrúar 2011. Hækkunin verður misjöfn eftir tegundum. Að sögn fyrirtækisins er ástæða hækkunarinnar hækkun á verði aðfanga á erlendum mörkuðum. Fóðublandan hækkaði verð síðast í desember s.l. og nú kostar algeng fóðurtegund eins og Kúakögglar-16 68.605 kr/tonn í lausu með magn- og staðgreiðsluafslætti. Eftir hækkun nú mun þessi sama fóðurtegund því kosta á bilinu 72.035-75.465 kr/tonn í lausu með magn- og staðgreiðsluafslætti eftir því hve mikil hækkunin verður.

Sauðfjárræktarráðunautar Búnaðarsambandsins eru frá störfum eins og sakir standa. Þórey Bjarnadóttir er komin í fæðingarorlof til eins árs og Fanney Ólöf Lárusdóttir er í veikindaleyfi. Á meðan sinnir tölvudeild BÍ allri þjónustu við www.fjarvis.is og Mark kerfið www.bufe.is. Merki má panta hjá Kristínu Helgadóttur, sími 563 0300, netfang: kh@bondi.is og best er að leita til Önnu Guðrúnar, sími 563 0300, netfang: agg@bondi.is með aðstoð við fjarvis.is.

Haldinn var fundur í samstarfsnefnd um sóttvarnir þar sem rætt var um nýlegar mælingar á díoxínmengun í mjólk og kjöti í Skutulsfirði, nálægum fjörðum og á Svínafelli. Fundinn sátu fulltrúar Matvælastofnunar, Sóttvarnarlæknis og Umhverfisstofnunar. Einnig komu á fundinn sérfræðingar í eiturefnafræðum. Ákveðið var á fundinum að haldnir verði borgarafundir í nágrenni eldri sorpbrennslna á Ísafirði, Kirkjubæjarklaustri og í Vestmannaeyjum þar sem fulltrúar Matvælastofnunar, Sóttvarnarlæknis og Umhverfisstofnunar munu kynna stöðu mála og næstu skref fyrir íbúum.

Sláturhúsin á á NV-landi, KS, SKVH og SAH, hafa nú hækkað verðskrár sínar og greiða nú mun hærra verð fyrir nautgripakjöt en Sláturfélag Suðurlands og Sláturhúsið Hellu. Samanborið við verðskrá SS er munurinn 23 kr/kg á UNIÚ A, 20 kr/kg á UNI A, 21 kr/kg á UNI M+ og 21 kr/kg á KI B og KI C. Í flestöllum verðflokkum munar 20-25 kr/kg. Ef þessi verðmunur er reiknaður á 250 kg fall munar 5.000 til 6.250 kr. á grip í innleggsverði. Verðskrá Sláturhússins á Hellu er mjög áþekk verðskrá SS en þar munar ekki nem 1-2 kr/kg ef munurinn er einhver á annað borð.

Aðalfundur Félags kúabænda á Suðurlandi var haldinn í Árhúsum á Hellu þann 31. janúar sl. Auk hefðbundinna aðalfundarstarfa var sérstakur gestur fundarins Stefán Haukur Jóhannesson, formaður aðalsamninganefndar vegna umsóknar Íslands um aðild að Evrópusambandinu.
Talsverðar umræður urðu í kjölfar erindis Stefáns. Í þeim kom m.a. fram það álit Stefáns að það sé „nánast útilokað“ að viðhalda tollvernd ef af aðild Íslands verður. Slíkt hljóta að teljast mikilvægar upplýsingar af hálfu aðalsamningamanns Íslendinga og á skjön við meirihlutaálit utanríkismálanefndar Alþingis frá 9. júlí 2009.

Rýnifundi um 11. kafla samningaviðræðna við Evrópusambandið, landbúnað og dreifbýlisþróun, lauk í Brussel í síðustu viku. Á fundinum, sem var sá síðari af tveimur, báru sérfræðingar Íslands og ESB saman löggjöf í þessum samningskafla. Fyrir íslenska hópnum fór Sigurgeir Þorgeirsson, formaður samningahópsins.
Landbúnaðarmál standa utan EES-samningsins og þarf að semja um þau frá grunni. Sameiginleg landbúnaðarstefna ESB byggir á sameiginlegum markaði fyrir landbúnaðarvörur, en engum tollum eða magntakmörkunum er beitt í viðskiptum með landbúnaðarvörur milli aðildarríkjanna. Til að tryggja stöðu landbúnaðar og jafna samkeppnisstöðu bænda er sameiginlegt stuðningskerfi fyrir landbúnað innan ESB, sem skiptist annars vegar í beinar greiðslur til bænda, sem alfarið koma af fjárlögum ESB, og hins vegar stuðning við dreifbýlisþróun sem er fjármagnaður sameiginlega af ESB og hverju aðildarríki.

Samkeppniseftirlitið hefur kveðið upp úrskurð um yfirtöku Stjörnugríss á svínabúunum á Hýrumel, Stafholtsveggjum og í Brautarholti. Niðurstaðan er að Samkeppniseftirlitið telur ekki forsendur til þess að hafast frekar að í málinu eins og segir í ákvörðunarorðum og mun eftirlitið því ekki koma í veg fyrir samrunann.
Forsaga málsins er að Arion banki yfirtók rekstur svínabúanna í Brautarholti, Hýrumel og Stafholtsveggjum á síðasta ári. Í byrjun mars 2010 var Samkeppniseftirlitinu tilkynnt um samruna þessara búa og í kjölfarið að gengið hefði verið frá kauptilboði Stjörnugríss hf. í eignir svínabúanna. Í júlí sama ár óskaði Stjörnugrís eftir undanþágu frá samkeppnislögum í ljósi þess að um væri að ræða kaup á bústofni félaganna til áframhaldandi eldis annars vegar og til slátrunar hins vegar.

Búvís ehf hefur gefið út fyrstu áburðarverðin sem birtast á þessu ári. Verðlistinn hefur sérlega stuttan gildistíma eða frá 1. febrúar s.l. til hádegis í dag, 4. febrúar. Fyrirtækið hyggst gefa út nýjan verðlista n.k. mánudag, 7. febrúar.
Samanburður á verðum milli ára hjá Búvís er örðugur þar sem ekki er um sömu tegundir að ræða og í fyrra. Þó má nefna að í verðlista fyrirtækisins frá því á sl. ári var 27-6-6 boðinn á 63.940 kr/tonn ef pantað var fyrir 12. mars. Í verðlistanum sem gildir fram á hádegi í dag er staðgreiðsluverð á 26-6-6 69.840 kr/tonn. Munurinn er 9,2%.

Sjávarútvegs- og landbúnaðarráðuneytið hafði samband við Landbúnaðarháskóla Íslands um mitt síðasta ár og óskaði eftir því að unnin væri skýrsla um sérstöðu íslensks landbúnaðar. Skýrslan átti að skapa grundvöll að samningsmarkmiðum íslensku samninganefndarinnar.

Þann 28. janúar síðastliðinn boðuðu Matvælastofnun og Búnaðarsamband Suðurlands til opins fræðslu- og umræðufundar í Fossbúð, Skógum. Tilefnið var uppkomin tilfelli lungnapestar í sauðfé undir Eyja-fjöllum og í Mýrdal. Frummælendur voru þau Halldór Runólfsson, Þorsteinn Ólafsson og Katrín Andrésdóttir, dýralæknar hjá MAST auk Eggerts Gunnarssonar, dýralæknis á Keldum. Fundarsókn var hin besta eða um 60 manns. Frummælendur fluttu fróðlegar tölur um eðli, útbreiðslu og aðgerðir gegn lungnasjúkdómum og studdu mál sitt með glærusýningu. Að erindum loknum var opnað fyrir umræður og fyrirspurnir en þar kom margt þarft fram í spurningum og svörum.

Dagana 31. janúar og 1. febrúar s.l var Þórey Bjarnadóttir ásamt þeim Jóni Viðari og Jóni Baldri frá BÍ með fundi um skýrsluhaldskerfið www.fjarvis.is. Einn fundur var í hverri sýslu og var þátttaka bænda góð. Jón Baldur fór yfir þróun kerfisins og hvaða verkefni væru framundan. Jón Viðar fór vel yfir skýrslurnar sem vinna má úr kerfinu og útskýrði fyrir fundarmönnum BLUP kynbótamatið og hvað það hefur mikið gildið í ræktunarstarfinu.

Við minnum á umsóknarfrestur vegna styrkja til fumbýlinga í sauðfjárrækt rennur út þann 1. mars n.k. Styrkir þessir hafa verið í boði frá því að núverandi sauðfjársamningur tók gildi 2008 og eru ætlaðir þeim sem eru að hefja sauðfjárrækt. Styrkumsóknum skal skila til Bændasamtaka Íslands.

Matvælastofnun kynnti fyrir áramótin hert eftirlit með því að ákvæði reglugerðar um merkingar búfjár væru virt. Þannig fylgist stofnunin nú með að rekstraraðilar sláturhúsa fari eftir ákvæðum reglugerðarinnar er banna þeim að taka til flutninga ómerkt búfé sem og setja afurðir af slíku fé á almennan markað. Í samræmi við ákvæði reglugerðarinnar mun ómerktu búfé sem kemur í sláturhús verða slátrað og takist ekki að rekja uppruna dýrsins innan 24 klst. verða afurðir sem dæmdar óhæfar til manneldis, þ.e. skrokkurinn fær ekki stimpil um heilbrigðisskoðun.
Fyrir bændur þýðir þetta að sláturleyfishöfum er óheimilt að taka til flutnings ómerkta gripi og sjálfsagt að setja viðkomandi bílstjóra ekki í þá stöðu að reyna að neyða hann til þess. Enn fremur getur þetta þýtt að afurðir gripa sem eru ómerktir, óskráðir eða rangt skráðir verða ekki settar á markað, þ.e. kjötinu verður hent án þess að greiðsla komi fyrir. Það þýðir einfaldelga tekjutap fyrir viðkomandi bónda.

Matvælastofnun hefur, með aðstoð fóðurframleiðenda, staðfest að það hráefni sem flutt hefur verið inn til fóðurgerðar eigi ekki uppruna að rekja til mengunarinnar. Ekki hefur verið hægt að rekja innflutning á búfjárafurðum til mengunarinnar og er því ekki ástæða að ætla að díoxínmengaðar afurðir hafi borist til landsins.

Föstudagskvöldið 4. febrúar verður aðalfundur Félags ungra bænda á Suðurlandi haldinn í Árhúsum á Hellu og hefst hann kl. 20:30.  Tæpt ár er nú liðið frá stofnfundi félagsins sem heppnaðist afar vel. Nú er komið að því að gera upp fyrsta árið í starfi félagsins og leggja drög að framtíðarverkefnum. Á dagskrá eru hefðbundin aðalfundarstörf s.s. skýrsla stjórnar og kosningar í stjórn og nefndir. Að loknum fundarstörfum fer síðan fram keppnin um skörpustu ungu sýslu Suðurlands 2011, Búsvar, þar sem Árnesingar eiga titil að verja.