Við minnum á fundi um skýrsluhaldskerfið fjarvis.is á starfssvæði búnaðarsambandsins sem hefjast í dag með fundi á Smyrlabjörgum í A-Skaft. kl. 14. Jón Viðar Jónmundsson og Jón Baldur Lorange frá BÍ munu mæta á fundina ásamt Þóreyju Bjarnadóttur. Þau fara yfir og ræða hina fjölbreytilegu möguleika til að sækja margvíslegar upplýsingar í kerfið.  Jafnframt er leitað eftir hugmyndum notenda um þá þætti sem brýnast er að lagfæra eða bæta við í kerfinu. Þá er mjög mikilvægt að bændur komi vel undirbúnir á fundinn til að einhverjar umræður skapist um kerfið.

Þá eru afurðaskýrslur nautgriparæktarfélaganna fyrir árið 2010 komnar á vefinn hjá okkur. Alls skiluðu 220 bú skýrslum á árinu 2010 og þar af 216 allt árið. Meðalafurðir á Suðurlandi minnkuðu aðeins eða úr 5.440 kg/árskú í 5.424 kg/árskú. Þátttaka í skýrsluhaldinu dróst aðeins saman og var 90,3% miðað við mjólkurinnlegg á árinu 2010 en 92,7% árið áður.

Lífeyrissjóður bænda mun innheimta 4% mótframlag á árinu 2011 vegna breytinga á á mótframlagsgreiðslum úr ríkissjóði. Sem kunnugt þurftu bændur að greiða 8% mótframlag frá júlí-des. í fyrra af reiknuðu endurgjaldi og launum en það lækkar nú í 4%. Greiðslur í Lífeyrissjóð bænda munu því verða samtals 8% af gjaldstofni, þ.e. 4% iðgjald að viðbættu 4% mótframlagi. Tryggingagjaldstofn er því reiknað endurgjald og laun að viðbættu 4% mótframlagi í lífeyrissjóð.

Ársuppgjör nautgriparæktarinnar hefur nú verið birt og afurðir á síðasta ári á tilraunabúinu á Stóra Ármóti enduðu í 6.972 kg mjólkur eftir árskú sem eru mestu afurðir þar frá upphafi. Segja verður að mjólkurframleiðsla þar hafi gengið ákaflega vel undanfarin ár og afurðir hafa aukist jafnt og þétt. Að verulegum hluta má þakka það hve vel hefur tekist til með það fóðrunarkerfi sem notast er við. Þá hefur betra uppeldi kvígnanna skilað betur undirbúnum gripum fyrir sitt hlutverk sem mjólkurkýr. Ekki má gleyma því að frjósemin hefur verið með ágætum og hefur tekist að halda bili milli burða innan skikkanlegra marka. Bil milli burða reiknast nú 390 dagar á búinu og fanghlutfallið 50% hjá kúnum en 71-72% hjá 1. kálfs kvígum og kvígum.

Ársuppgjör skýrsluhalds nautgriparæktarinnar 2010 verður væntanlega sett á vefinn í dag. Afurðir eru heldur minni en í fyrra eða 5.342 kg/árskú á móti 5.358 kg/árskú á árinu 2009. Hér á Suðurlandi minnkuðu afurðir eftir árskú lítillega milli ára eða um 16 kg, úr 5.440 kg árið 2009 í 5.424 kg árið 2010. Afurðahæsta búið á landinu á síðasta ári var hjá Jóni og Hrefnu á Hóli í Sæmundarhlíð en þar mjólkuðu 34,4 árskýr 7.818 kg mjólkur til jafnaðar. Í öðru sæti er Steinar Guðbrandsson í Tröð í Borgarbyggð (fyrrum Kolbeinsstaðahreppi) en hjá honum mjólkuðu 23,7 árskýr 7.802 kg að meðaltali.
BSSL raðar afurðahæstu búum ekki eftir mjólkurmagni heldur verðefnum og er þar miðað við mjólkurmagn úr skýrsluhaldi og meðalefnainnihald úr tanksýnum hjá MS. Afurðahæsta búið á Suðurlandi er að þessu sinni bú þeirra Eggerts, Jónu og Páli á Kirkjulæk í Fljótshlíð. Þar mjólkuðu kýrnar til jafnaðar 7.671 kg mjólkur á árskú og 568 kg verðefna (MFP).

Á síðasta stjórnarfundi Búnaðarsambands Suðurlands sem haldinn var 21. jan. s.l. var meðal annars rætt um eldgosið í Eyjafjallajökli og áhrif þess. Þar kom fram að sá tímafrestur sem gefinn er til tjónaumsókna í Bjargráðasjóð er tæpast nægilega langur til þess að tjón og áhrif þeirra verði að fullu metinn. Stjórn Búnaðarsambandsins hefur því sent stjórn Bjargráðasjóðs eftirfarandi áskorun þess efnis að hún beiti sér fyrir endurskoðun á reglunum:

Þorstein Logi Einarsson og Sigmar Aðalsteinsson sjá um klaufsnyrtingu fyrir Kynbótastöð Suðurlands. Þeir bændur sem áhuga hafa á að láta snyrta klaufir kúa sinna hafi samband við Þorstein Loga í síma 867-4104 og eða í netfangið thorsteinn82@simnet.is. Þá er líka hægt að panta klaufskurð á skrifstofu Búnaðarsambandsins. Á síðasta ári voru klaufir á 2.593 kúm á 75 bæjum klipptar á Suðurlandi. Kostnaður við klaufskurð á síðasta ári var kr. 725 á kú.

Búnaðarsamband Suðurlands og Matvælastofnun boða til fundar um lungnasjúkdóma í sauðfé í Fossbúð, föstudaginn 28. janúar 2011 kl 13:00. 
Allt áhugafólk um sauðfjárrækt er velkomið

Vatnavextir á Suðurlandi eru nú í rénun að mestu en þó er rennsli Ölfusár við Selfoss enn að aukast og nær hámarki síðdegis eða í kvöld, samkvæmt upplýsingum frá Veðurstofunni. Vatnsborð í Hvítá er farið að lækka við Iðu og hefur líklega náð hámarki við Gíslastaði undir Hestfjalli snemma í morgun.

Miklir vatnavextir eru nú á vatnasviði Hvítár í Árnessýsu vegna hlýinda á landinu og úrkomu. Í Auðsholti í Hrunamannahreppi hefur áin flætt yfir bakka sína en ekki meira en venjan er á þessum árstíma. Rennslið í Hvítá við Fremstaver á Kili er margfalt meira en vanalega eða tæpir 430 rúmmetrar á sekúndu og að sögn Veðurstofunnar er ástæðan hlýindi á hálendinu og hröð snjóbráðnun þar. Veðurstofan lét Almannavarnir Árnessýslu, það er lögregluna, vita á miðnætti og varaði við vatnavöxtum.

Verð á mjólk til bænda mun hækka þann 1. febrúar n.k. um 3,25 kr/l, þ.e. úr 71,13 kr. í 74,38 kr. Þetta er 4,56% á afurðastöðvaverði mjólkur. Jafnframt hefur Verðlagsnefnd búvara ákveðið að heildsöluverð á mjólk og mjólkurafurðum, sem nefndin verðleggur, hækki 1. febrúar n.k. um 2,25% að meðaltali, þó þannig að nýmjólk hækkar hlutfallslega til jafns við hækkun til bænda. Þessar verðhækkanir eru tilkomnar vegna hækkana á breytilegum kostnaði til búrekstrar.
Sú hækkun á afurðastöðvaverði sem bændur fá að þessu sinni byggir á hækkun kostnaðarhliðar verðlagsgrundvallar frá 1. desember 2009 til 1. desember 2010 að frádregnu viðhaldi, afskriftum, vöxtum og launum. Gæta verður að því að breytingar á vaxtalið á þessu tímabili eru neikvæðar, þar sem vextir hafa lækkað mjög á framangreindu tímabili.
Þessi hækkun sú fyrsta sem kúabændur fá í 26 mánuði, eða frá 1. nóvember 2008 en við síðustu verðbreytingu, 1. ágúst 2009, kom verðhækkunin hins vegar öll í hlut mjólkuriðnaðarins.

Vefsíða Búnaðarsambandsins var vinsæl á síðasta ári að venju ef tekið er mið af því að um sérhæfðan landbúnaðarvef er að ræða. Alls heimsóttu 19.621 vefinn í 181.843 heimsóknum. Töluverð aukning varð í bæði gestafjölda og fjölda heimsókna milli ára. Gestum fjölgaði um 3.518 milli ára og heimsóknum um 15.418. Síðuflettingum fjölgaði einnig milli ára eða úr 410.615 á árinu 2009 í 432.159 á síðasta ári. Það má því segja að á meðaldegi sé vefsvæðið bssl.is heimsótt 500 sinnum og flettingar séu 1.184.

Á árinu 2010 nam heildarinnlegg kúabúa á Suðurlandi 48,185 milljónum lítra sem er 1,4 milljónum lítra minna en árið áður. Meðalbústærð var því 192.494 lítrar á móti 195.277 lítrum árið áður. Inni í tölum um meðalbústærð eru aðeins bú með innlegg allt árið. Mest var innleggið úr Árnessýslu eða 24,682 milljónir lítra og þar er meðalbústræðin einnig mest eða 224.104 lítrar. Úr Rangárvallasýslu komu 17,5 milljónir lítra til innleggs, að meðaltali 192,5 þús. lítrar á bú. Mun minni framleiðsla er í Skaftafellssýslunum báðum. Mjólkurinnlegg síðasta árs í V-Skaft. nam 3,7 millj. lítra og meðalinnlegg á bú var 94,4 þús. lítrar en í A-Skaft. nam innleggið 2,3 milljónum lítra eða að meðaltali 176 þús. lítrar á bú.

Ný stjórn hefur verið skipuð hjá Lífeyrissjóði bænda. Loftur Þorsteinsson og Guðmundur Grétar Guðmundsson láta nú af störfum en nýir stjórnarmenn eru Vigdís M. Sveinbjörnsdóttir og Rögnvaldur Ólafsson. Skúli Bjarnason verður áfram formaður stjórnar.

Haft er eftir Haraldi Benediktssyni, formanni Bændasamtakanna, í Morgunblaðinu í dag að sameining ráðuneyta í eitt atvinnuvegaráðunetyti eigi að ganga hratt fyrir sig en hann viti ekki hversu hratt. Fulltrúum atvinnuveganna hefur verið boðið á kynningarfund um áformin á morgun, föstudag. Í Morgunblaðinu í gær kom fram að sameining sjávarútvegs-, landbúnaðar og iðnaðarráðuneytis væri komin á fulla ferð, en þó er kynningarfundurinn á morgun það fyrsta sem hlutaðeigandi samtök atvinnugreinanna heyra um samráð. Lengi hefur andstaða þeirra við sameininguna verið yfirlýst og stjórnvöld heitið því að hún verði gerð í góðu samráði og samvinnu við atvinnulífið.
„Þetta er ekki hugmyndin um samvinnu og upplýst samráð um að búa til nýtt stjórnarráð. Ég hafði nú aðrar hugmyndir um það,“ segir Haraldur. Afstaða BÍ hafi ekki breyst og enn sé litið svo á að þetta sé fyrst og fremst aðgerð til að berja niður andstöðu við ESB-aðild, með því að losna við Jón Bjarnason úr ríkisstjórn.

„Ég gef mér það að sjávarútvegs- og landbúnaðarráðherra, eins og ég og aðrir ráðherrar, hlíti fyrirmælum Alþingis. Menn geta verið á móti einstökum niðurstöðum Alþingis en ráðherrum ber skylda til að fara eftir því. Ég óttast alls ekki að sjávarútvegs- og landbúnaðarráðuneytið leggi með einhverjum hætti steina í götu ferilsins þar sem við erum að hlíta fyrirmælum Alþingis,“ segir Össur Skarphéðinsson utanríkisráðherra um svar sjávarútvegs- og landbúnaðarráðuneytisins til ESB, um að engum lögum verði hér breytt til að aðlagast ESB, nema aðild verði formlega samþykkt. Þetta kemur fram í Morgunblaðinu í dag.

Bændur á kúabúi á Norðurlandi eystra hafa gengist við því að hafa vanrækt að tryggja kúm á búinu lögbundna útiveru. Greiddu bændurnir sekt upp á fimmtíu þúsund krónur vegna brotsins. Þetta kemur fram á bbl.is.
Matvælastofnun kærði níu kúabú í nóvember síðastliðnum vegna brota á reglum um útivist. Hin málin átta eru enn í ferli hjá viðkomandi lögregluyfirvöldum, misjafnlega langt komin.

Samkvæmt upplýsingum frá Samtökum afurðastöðva í mjólkuriðnaði nam mjólkurinnvigtun á árinu 2010 samtals 123,2 milljónum lítra sem er 2,4 milljónum lítrum eða 1,9% minna en árið 2009. Innvigtun mjólkur í desember, til afurðastöðva innan SAM, var 3,2% minni en í desember árið 2009.
Sala mjólkurvara árið 2010 var undir væntingum, en samtals var salan á próteingrunni 114,7 milljónir lítra eða 1,21% minni en árið áður. Sala mjólkurvara á fitugrunni var einnig undir væntingum, en samtals var salan 110,7 milljónir lítra sem er samdráttur um 0,83% frá árinu 2009.
Sala í desember s.l. var töluvert minni en í sama mánuði árið áður en samdráttur í sölu á próteingrunni nam 3,4% og 6,7% á fitugrunni.

Engin áform eru um að breyta íslenskum lögum eða reglugerðum til að stofna greiðslustofnun í landbúnaði eða taka upp byggðaáætlun að hætti Evrópusambandsins (ESB), fyrr en aðild að sambandinu hefur verið samþykkt í þjóðaratkvæðagreiðslu og formlega staðfest af Íslandi og ESB að því er fram kemur í Morgunblaðinu í dag.
Þetta kemur fram í svörum sjávarútvegs- og landbúnaðarráðuneytisins við spurningum ESB í kafla 11 um landbúnað og byggðamál. Svörin hafa verið send samninganefnd Íslands gagnvart ESB, samkvæmt heimildum Morgunblaðsins. ESB spyr m.a. hvernig og hvenær Ísland hyggist aðlaga lagaumhverfið sitt hvað varðar stofnun greiðslustofnunar og fleiri breytingar varðandi stjórn- og eftirlitskerfi landbúnaðarins.

Þriðjudaginn 17. janúar fengu notendur dkBúbótar sendan tölvupóst með hlekk á uppfærslu vegna launa- og hlutafjármiða. Notendur eru hvattir til að kynna sér leiðbeiningar vel áður en uppfærslan er sótt. Þeir notendur sem ekki geta sótt uppfærsluna rafrænt eru beðnir um að óska eftir henni á geisladisk í netfangið tolvudeild@bondi.is.