Búnaðarsamband Suðurlands óskar bændum, fjölskyldum þeirra og öllum samstarfsaðilum sínum gleðilegra jóla og farsæls nýs árs með þökkum samskiptin og samstarfið á árinu sem er að líða. Skrifstofa Búnaðarsambandsins verður opin sem hér segir yfir hátíðarnar:
– fös. 24. desember, aðfangadagur: Lokað

Starfsmenn Kynbótastöðvar Suðurlands senda öllum kúabændum og fjölskyldum þeirra sínar bestu jólakveðjur með þökk fyrir samstarfið á árinu sem er að líða.
Minnt er á að ekki er um að ræða sæðingar á jóladag og nýársdag en aðra daga er sætt að venju.

Nautaskrá veturinn 2010-11 er komin út og farin í dreifingu. Skránni verður að venju dreift með mjólkurbílum MS og ætti að berast bændum í dag og á morgun eftir því hvernig stendur á ferðum mjólkurbílanna.

Vel heppnaðri sæðistökuvertíð lauk 21. desember að venju en þá hafði hún staðið yfir frá mánaðamótum. Að þessu sinni voru sendir út sæðisskammtar í rúmlega 19 þúsund ær. Miðað við 70 % nýtingu á því hafa 13.400 ær verið sæddar með sæði frá stöðinni sem er 800 ám færra en í fyrra. Langmest var sent úr Grábotna frá Vogum eða sæði í 2.865 ær sem er langmesta notkun á hrút frá stöðinni í Þorleifskoti, en haustið 2006 voru 2.390 sæðisskammtar sendir úr Rafti frá Hesti. Að meðaltali fór sæði úr Grábotna í 136 ær á dag og einn daginn náðust 280 skammtar úr honum sem er mesta sæðistaka úr einum hrúti á dag hér á landi.

VÍS hefur um árabil boðið bændum „landbúnaðartryggingu“ sem er sérsniðin trygging fyrir búrekstur. Landbúnaðartryggingin er víðtæk og tekur til búfjár, heyja og annars fóðurs samkvæmt forðagæsluskýrslum ásamt áhöldum og tækjum sem tilheyra hefðbundinni búfjárrækt. Einnig er ábyrgðartrygging bænda innifalin í tryggingunni.
VÍS hefur nú útvíkkað skilmála landbúnaðartryggingarinnar sem felst í því að bæta við rekstrarstöðvun vegna kjötframleiðslu sem tekur á framlegðartapi sem verður vegna bruna. Bóndi sem verður fyrir því tjóni að missa bú sitt í bruna fær því greidda framlegð (greiðslur vegna kjötframleiðslu að frádregnum hefðbundnum kostnaði) af kjötsölu ef fullnaðarbætur fást ekki greiddar úr lausafjárhluta landbúnaðartryggingarinnar.

Á heimasíðu Matvælastofnunar kemur fram að stofnunin hyggst herða eftirlit með merkingum búfjár ef komandi áramót en hingað til hefur verið látið nægja að koma á framfæri ábendingum um lagfæringar. Stofnunin hyggst banna alfarið flutning sláturhúsa á ómerktum gripum til slátrunar og komi slíkt til verður kjötið dæmt óhæft til manneldis í samræmi við ákvæði reglugerðar. Jafnframt verður í auknum mæli um bann á flutningi að ræða frá þeim aðilum er ekki fara eftir ákvæðum reglugerðar um merkingar búfjár.
Sem betur fer eru þessu mál í góðu lagi hjá miklum meiri hluta bænda en því miður eru ávallt einhverjir svartir sauðir innan um.
Tilkynnig Matvælastofnunar fer hér á eftir:

Í Fréttablaðinu í dag er grein eftir Hauk Eggertsson, verkfræðing, um viðskipti með mjólkurkvóta á nýafstöðnum kvótamarkaði. Um efni greinarinnar og fullyrðingar Hauks verður ekki fjölyrt né heldur hvort að þær forsendur og ályktanir sem hann dregur af þeim séu réttar. Greinin er hins vegar allrar athygli verð fyrir kúabændur og sjálfsagt að kynna sér efni hennar.

Félagsráð Félags kúabænda á Suðurlandi fundaði 7. desember s.l. Á fundinum var eftirfarandi ályktun samþykkt:
“Félagsráð Félags kúabænda á Suðurlandi lýsir þungum áhyggjum yfir stöðu kúabænda ef ekki tekst að leiðrétta lágmarksverð mjólkur. Það vill eindregið hvetja verðlagsnefnd til að lita á hversu alvarleg staðan í greininni getur orðið ef ekki tekst að koma leiðréttingu á lágmarksverði mjólkur fram sem fyrst.

Nýtt fyrirtæki, Kú ehf., hefur hafið framleiðslu og sölu á mygluostum. Ólafur M. Magnússon, oft kenndur við Mjólku, er framkvæmdastjóri fyrirtækisins sem er í eigu fjölskyldu hans að Eyjum 2 í Kjós. Ólafur hefur látið hafa eftir sér að framleiðsla fyrirtækisins verði unnin úr mjólk sem framleidd er utan greiðslumarks á Eyjabúinu. Jafnframt hafi fyrirtækið tryggt sér kaup á viðbótar mjólk frá Mjólkursamsölunni til framleiðslunnar en stefnt sé að því að skipta við fyrirtækið Vesturmjólk í Borgarnesi í framtíðinni. Það sé eðlilegt enda hyggist það fyrirtæki einnig standa utan greiðslumarkskerfisins. Þetta kemur fram í nýju Bændablaði sem kom út í morgun.

Við sæðistöku í morgun, fimmtudaginn 16. desember, gaf Grábotni 06-833 samtals 56 strá eða 280 sæðisskammta. Þetta er mesta magn sem hrútur hefur gefið af sæði á einum degi hjá Sauðfjársæðingastöð Suðurlands og llíklega á landinu öllu.

Skipuð hefur verið kjörnefnd til undirbúnings kosninga í félagsráð fyrir aðalfundi Félags kúabænda á Suðurlandi sem haldinn verður um mánaðarmótin janúar/febrúar. Þeim sem vilja gefa kost á sér eða koma á framfæri uppástungum um fólk til þessara trúnaðarstarfa er bent á að setja sig í samband við nefndina, en hana skipa:

Samtökin Beint frá býli hafa nú gefið út skýrslu um verðlagningu á heimteknum sauðfjárafurðum. Þar er m.a. að finna samanburð á sláturkostnaði sem hlutfalli af verðmæti dilks milli sláturhúsa og landa. Þar kemur fram að sláturkostnaður er langhæstur hérlendis og lægstur í Skotlandi og Danmörku af þeim löndum sem könnunin tekur til. Þar er nemur hlutfallið 10-15% meðan að sláturkostnaður hér á landi er frá um 35% upp í yfir 40% af verðmæti hvers dilks.

Að því er fram kemur á heimasíðu Landssamtaka sauðfjárbænda hefur sjávarútvegs- og landbúnaðarráðuneytið hefur staðfest tillögu BÍ og LS um fyrirkomulag útborgunar á geymslugjöldum til bænda, en eins og kunnugt er þá munu þau greiðast innleggjendum beint héðan í frá í stað sláturleyfishafa.
Geymslugjald greiðist pr. kg á allt framleitt kindakjöt þ.m.t. heimtekið og greiðist beint til viðkomandi innleggjanda skv. þeim gögnum sem liggja fyrir hjá Bændasamtökunum.
Bændur sem eru fjárlausir vegna riðuniðurskurðar fá greiðsluna einnig. Hjá þeim liggur fyrir útreiknað afurðamagn sem notað er til að greiða afurðatjónsbætur og verður miðað við það.

Sölutölur á kindakjöti sýna að sala á erlenda markaði heldur áfram að aukast og verður útflutningur þess æ mikilvægari fyrir greinina. Í nóvember s.l. var flutt út 431 tonn af kindakjöti sem er ríflega 30% meira en á sama tíma í fyrra. Þannig reyndist útflutningur í nóvember vera meiri en innanlandssala sem ekki hefur gerst i einstökum mánuði a.m.k. síðustu 10 ár. Útflutningur ársins er orðinn tæp 3.300 tonn eða 36% af heildarsölunni, segir í tilkynningu frá Landssamtökum sauðfjárbænda.

Uppgjör skýrsluhalds nautgriparæktarinnar fyrir október er lokið og standa meðalafurðir á árskú nú í 5.323 kg yfir landið allt sem er 5 kg mera en í fyrra mánuði. Afurðir eru nokkru meiri hér á Suðurlandi eða 5.436 kg/árskú til jafnaðar og hafa einnig aukist um 5 kg milli mánaða. Afurðir eru nú mestar í Rangárvallasýslu eða 5.505 kg/árskú og síðan 5.500 kg/árskú í Árnessýslu.
Afurðahæsta búið á landinu er hjá Steinari Guðbrandssyni í Tröð í Borgarbyggð eða fyrrum Kolbeinsstaðahreppi. Þar hafa kýrnar mjólkað 7.850 kg/árskú til jafnaðar síðustu 12 mánuði sem er nokkur lækkun frá október.

Verið er að setja upp vélbúnað í nýja mjólkurstöð í Borgarnesi að því er fram kemur í Skessuhorni. Að sögn Bjarna Bærings bónda og talsmanns eigenda fyrirtækisins Vesturmjólkur er stutt í að fyrsta framleiðslan komi á markað, en það verður þó ekki á þessu ári. Bjarni segir að vonast sé til að einhver súrvara verði framleidd núna fyrir jólin; skyr, jógúrt eða súrmjólk, en hún fari þá til stóreldhúsa, mötuneyta og hóteleldhúsa.

Sjávarútvegs- og landbúnaðarráðuneytið hefur staðfest breytingu á reglum um nýliðunarstyrki í sauðfjárrækt sem felst í því að nú er hægt að sækja um framlög fimm ár í röð í stað þriggja áður, þó aldrei lengur en út gildistíma núverandi sauðfjársamnings. Breytingin er gerð að tillögu Samtaka ungra bænda, en var samþykkt af stjórnum Landssamtaka sauðfjárbænda og Bændasamtaka Íslands og síðan staðfest af sjávarútvegs og landbúnaðarráðuneytinu.

Lífland hefur tilkynnt um hækkun á kjarnfóðri sem tekur gildi fimmtudaginn 9. desember n.k. Hækkunin er á bilinu 2-8%, mismunandi eftir tegundum. Að því er fram kemur í tilkynningu frá fyrirtækinu er ástæða hækkunarinnar mikil hækkun á heimsmarkaði á hráefnum til fóðurgerðar.

Almennum haustfundum Bændasamtakanna lýkur í dag, mánudaginn 6. desember, með fundum á Smyrlabjörgum kl. 14.00 og á Geirlandi kl. 20.30.
Á fundunum verða m.a. rædd þau tækifæri sem landbúnaðurinn hefur til þess að efla þjóðarhag og hvar sóknarfæri liggja. Nýgerður búnaðarlagasamningur verður til umfjöllunar og spurt verður hvernig unnt er að verja kjör bænda í erfiðu efnahagsástandi.

Endurmenntun LbhÍ er að fara í gang með nýtt námskeið sem hlotið hefur heitið Sáðmaðurinn. Þetta er jarðræktarnám sem ætlað er fróðleiksfúsu jarðræktarfólki, bændum, verktökum og þjónustuaðilum, sem vilja ná enn betri árangri í jarðrækt og fóðuröflun. Lögð er mikil áhersla á virka þáttköku nemenda, bæði í kennslu og umræðu. Námskeiðaröðin byrjar í janúar á næsta ári og endar með útskriftarhátíð á vormánuðum 2012.