Í gær fundaði Ræktunarhópur Fagráðs í nautgriparækt. Þar var m.a. farið yfir nýtt kynbótamat og tekin ákvörðun um hvaða naut verða í dreifingu á næstu mánuðum. Ákveðið var að setja í dreifingu 11 ný naut úr 2004 árgangnum. Þannig koma þeir Stássi 04024, Stíll 04041 og Ári 04043 til dreinfgar sem nautsfeður. Önnur naut sem koma til dreifingar úr þessum árgangi eru; Grikkur 04004, Þinur 04006, Salómon 04009, Hlaupari 04010, Þrumari 04015, Hjálmur 04016, Rauður 04021 og Jaki 04044. Dreifing úr þessum nautum mun hefjast á næstu vikum.

Dagana 16.-17. september síðastliðinn fóru tveir ráðnautar frá BSSL á vinnufund til Noregs að ræða nýja fóðurmatskerfið NorFor. Ætlunin er að bjóða bændum upp á fría fóðurætlun þennan veturinn meðan ráðnautar og bændur eru að læra á nýtt kerfi. Reynsla þeirra þjóða sem nú nota NorFor-kerfið (Danir, Norðmenn og Svíar) er sú að fóðrun verður bæði markvissari og spara má verulegar fjárhæðir.

Á vegum Matvælastofnunar hefur verið fylgst með áhrifum eldgossins í Eyjafjallajökli á heilsufar búfjár frá því gosið hófst og verður eftirliti og rannsóknum haldið áfram í haust.
Á yfirstandandi sláturtíð verða tekin sýni úr samtals 60 lömbum frá tólf bæjum og 9 hrossum frá þremur bæjum á áhrifasvæði eldgossins í Eyjafjallajökli. Lungu verða skoðuð á Tilraunastöðinni á Keldum með tilliti til stór- og smásærra breytinga, tennur m.t.t. breytinga í glerungi og flúor verður mælt í kjálkabeinum. Einnig verða tekin lifrar- og mjólkursýni til mælinga á kadmíum, kvikasilfri, blýi og flúor. Viðmiðunarsýni verða tekin úr lömbum og hrossum frá bæjum á Norðurlandi.

Við minnum á að umsóknarfrestur styrkja vegna jarðabóta og þróunarverkefna rennur út í þessari viku, þ.e. fimmtudaginn 30. september n.k.
Eftirfarandi styrki er hægt að sækja um núna:
– Endurræktun vegna aðlögunar að lífrænum búskap
– Viðhald framræslu lands vegna ræktunar
– Kölkun túna
– Jarðrækt (korn-, tún- og grænfóðurrækt)

Á næstu dögum mun birtast hér á vefnum, í sauðfjárræktarhlutanum undir „Hrútaskrá“, kynning á nýjum hrútum á sæðingastöðvunum sumarið 2010. Á síðustu árum hafa slíkar kynningar verið viðhafðar til að gefa forsmekk að hrútaskrá haustsins.
Hópur nýju hrútanna frá sumrinu telur níu gripi (Því miður drapst einn hrútur eftir að þeir voru komnir í einangrunargirðingarnar). Þessir hrútar eru sóttir vítt og breitt um landið af þeim svæðum sem stöðvarnar hafa leyfi til að sækja slíka gripi, en nær helmingur landsins er bannsvæði í þeim efnum. Birt er mynd af hrútnum og rétt að vekja athygli á því að myndirnar úr annarri einangrunargirðingunni eru teknar það snemma að ullarvöxtur hrútanna er varla kominn nægjanlega vel í gang og þarf að skoða myndirnar með hliðsjón af því. Síðan er örstutt umfjöllun í texta um gripinn. Að lokum er í sérstakt skjal hægt að sækja drög að ættarskrá hrútsins, sem er að vísu ákaflega misítarleg fyrir einstaka gripi. Hrútarnir munu birtast dag frá degi í stafrófsröð.

Við viljum vekja athygli á nýlega útkominni bók sem heitir Heimavinnsla mjólkurafurða – Ostagerð. Bókin byggir á efni sem tekið var saman vegna námskeiða sem Endurmenntun Landbúnaðarháskóla Íslands hélt á fyrri hluta ársins 2009. Þórarinn Egill Sveinsson mjólkurverkfræðingur fór þá víða um land og kenndi fólki undirstöðuatriði í ostagerð í heimahúsum. Fljótt kom í ljós mikill áhugi á ostagerð og var þess farið á leit við Þórarin Egil að hann setti saman bók um efnið. Starfsmenntaráð styrkti útgáfuna.

Bjargráðasjóður hóf greiðslur vegna tjóna af völdum eldgossins í Eyjafjallajökli um miðjan júnímánuð síðastliðinn og hefur greitt út bætur jafnt og þétt frá þeim tíma. Verkefni sjóðsins vegna eldgossins eru margvísleg. Stærstu liðirnir eru tjón á ræktarlandi, tjón á girðingum, hreinsun skurða, hagaganga, kaup og flutningar á heyi og flutningar á búfé. Einnig eru dæmi um að slíkt magn eðju hafi farið yfir ræktarland að nauðsynlegt hefur reynst að fjarlæga hana áður en hægt hefur verið að ráðast í endurrækt.

Formlega séð er gosinu í Eyjafjallajökli ekki lokið enn. Það er Almannavarnardeild Ríkislögreglustjóra sem tekur ákvörðun um hvenær goslokum verður lýst yfir en að sögn Ágústs Gunnars Gylfasonar hjá Almannavörnum er engu hægt að spá um hvenær sú ákvörðun verði tekin. „Eins og er hefur ekki verið ekki verið tekin ákvörðun um að lýsa því yfir að gosinu sé lokið og það er bara ákvörðun sem við endurskoðum og förum yfir með reglulegu millibili. Það hefur ekki verið tekin ákvörðun um hvenær verður næst farið yfir stöðuna.“  Þetta hefur áhrif á bótagreiðslur frá Viðlagatryggingu.

Við viljum vekja athygli kaupenda líflamba á því að samkvæmt reglugerð um flutning líflamba milli landsvæða er skylt að meðhöndla líflömb með lyfjum gegn sníkjudýrum fyrir flutning. Sérstaklega á þetta við um lömb úr Norðausturhólfi þar sem sérstakir lungnaormar eru landlægir en á þó við um alla flutninga líflamba.

Bændasamtök Íslands hafa sent utanríkisráðherra og utanríkismálanefnd bréf þar sem þess er krafist að staða landbúnaðar í samningaferlinu við Evrópusambandið verði skýrð.
Samtökin telja að bæði stjórnvöld og Evrópusambandið hafi þrýst verulega á um að stjórnsýsla og löggjöf verði aðlöguð að reglum Evrópusambandsins meðan á aðildarviðræðunum stendur og áður en aðildarumsóknin hefur fengið stjórnskipulega meðferð. Það sé í andstöðu við það sem sagt var þegar aðildarumsóknin var send.

Lömb virðast koma ágætlega væn af fjalli víðast hvar og meðalfallþungi virðist svipaður eða jafnvel ívið betri það sem af er sláturtíðar en í fyrra. Fram kemur á mbl.is að Ágúst Andrésson, forstöðumaður kjötafurðastöðvar Kaupfélags Skagfirðinga á Sauðárkróki telji ræktunina vera að skila sér í betra vaxtarlagi.
Einar Hjálmarsson, stöðvarstjóri í sláturhúsi SS á Selfossi segir að lömbin séu ágætlega væn og líti vel út. Meðalfallþungi þar er 16,2 kg það sem af er. Meðalfallþunginn yfir landið hefur síðustu ári verið um 15,5 kg. Einar á von á því að menn hafi verið að láta vænstu lömbin nú í upphafi en telur þó ekki ólíklegt að meðalvigtin verði heldur meiri í ár en undanfarin ár.

Eiríkur Blöndal, framkvæmdastjóri Bændasamtakanna segir nauðsynlegt að staða bænda sem tóku gengisbundin lán, verði skýrð hið fyrsta. Hann leggur áherslu á að skuldamál bænda séu meðhöndluð á sama hátt og hjá einstaklingum og heimilum.

Hæstiréttur sýknaði í vikunni þrjá einstaklinga af broti á lögum um eldi og heilbrigði sláturdýra, slátrun, vinnslu, heilbrigðisskoðun og gæðamat sláturafurða, með því að slátra 19 lömbum utan löggilts sláturhúss, til eigin nota. Talið var að ekki væri um refsiverða háttsemi að ræða.

Þessa dagana stendur kornþresking sem hæðst á Suðurlandi. Góð uppskera virðist vera á korni víðast, þó eitthvað sé það misjafnt milli akra. Undir Eyjafjöllum og víðar í Rangárþingi velta menn því einnig fyrir sér hvort askan úr Eyjafjallajökli og þau næringarefni sem henni fylgdi, hafi góð áhrif á uppskeruna.

Í kjölfars dóms Hæstaréttar Íslands sem féll nú áðan, á þann veg að ólögmæt gengislán skulu bera óverðtryggða vexti Seðlabanka Íslands, hefur efnahags- og viðskiptaráðuneytið sent frá sér fréttatilkynningu þar sem lagasetning er boðuð. Tryggt verði með lögum að niðurstaða Hæstaréttar nái til allra lána vegna bíla- og húsnæðiskaupa sem tengd eru gengi erlendra gjaldmiðla.

Hæstiréttur Íslands staðfesti nú rétt áðan dóm Héraðsdóms Reykjavíkur frá 23. júlí sl. um að vextir á ólögmætum gengistryggðum lánum skuli vera óverðtryggðir vextir Seðlabanka Íslands frá lántökudegi.

Sala á íslenskum minkaskinnum hefur gengið vel á yfirstandandi uppboði hjá Kopenhagen Fur í Danmörku. Íslensk skinn hafa aldrei selst á betra verði en nú og hafa farið í allt að 540 dönskum krónum stykkið. Það eru rúmar 11 þús. ISK. Allt stefnir í að útflutningsverðmæti minkaskinna frá Íslandi verði rúmur milljarður á þessu ári en meðalverðið verður líklega á bilinu 310-320 DKK.
„Minkaskinn eru flokkuð og seld eftir gæðum og stærð. Miklar framfarir hafa orðið í framleiðslunni hér en Ísland er nú í 3. sæti yfir lönd sem framleiða verðmætustu skinnin. Danir trjóna á toppnum og þeim næst koma Norðmenn en alls eru minkaskinn framleidd í á fjórða tug landa“, að sögn Einars E. Einarssonar loðdýraræktarráðunautar hjá BÍ. Einar segir að um 500 kaupendur séu á uppboðinu þar af um helmingur frá Asíu.

Uppgjör skýrsluhalds nautgriparæktarinnar fyrir ágúst hefur verið birt á vef BÍ. Afurðir hér á Suðurlandi standa nú í 5.483 kg/árskú sem er 43 kg meira en um áramótin síðustu. Af sýslunum fjórum eru afurðir nú mestar í Árnessýslu eða 5.563 kg /árskú. Á landsvísu standa afurðir eftir árskú nú í 5.334 kg.
Tröð í Borgarbyggð (fyrrum Kolbeinsstaðahreppi) er sem stendur afurðahæsta búið með 7.848 kg/árskú. Af sunnlenskum búum er Reykjahlíð efst og í þriðja sæti á landsvísu með 7.661 kg/árskú. Þar skammt á eftir kemur Gunnbjarnarholt með 7.508 kg/árskú og er í fjórða sæti á landsvísu. Gunnbjarnarholt er langstærsta búið á landinu sem er með afurðir yfir 7.000 kg/árskú að loknu ágúst-uppgjöri með 109,6 árskýr. Þau bú hafa aldrei verið fleiri en nú eru 18 bú sem ná þessu marki og hefur fjölgað um eitt frá því í júlí.

Arla ákvað í dag að byggja nýtt mjólkurbú við Aston Clinton, Aylesbury, rétt um 70 km utan við London. Mjólkurbúið kemur til með að kosta um 150 milljónir punda eða rétt um 27,5 milljarða ISK. Mjólkurbúið verður jafnframt það fyrsta í veröldinni sem getur tekið við meira en einum milljarði lítra mjólkur á ári eða eða rétt tæplegra tífaldri landsframleiðslu Íslands á mjólk.

Ljóst er að frumvarp til breytinga á búvörulögum, mjólkurfrumvarpið svokallaða, verður ekki samþykkt á yfirstandandi þingi. Líkur eru til þess að nýtt frumvarp, í talsvert breyttri mynd, verði lagt fram á haustþingi. Þær breytingar gætu falið í sér að sektarákvæði verði felld út úr frumvarpinu en í stað þess yrði tekið upp útflutningsgjald á umframmjólk sem myndi hugsanlega miðast við verðlagsnefndarverð til mjólkurbænda eða mismun á útflutningsverði og verðlagsnefndarverði. Þá er rætt um að hækka ívilnun til aðila í heimavinnslu upp í 20.000 lítra.