Fóðurblandan hefur sent frá sér tilkynningu um lækkun á húsdýrafóðri um allt að 4%. Lækkunin tekur gildi í dag, föstudaginn 21. maí. Í tilkynningunni segir að lækkunin sé tilkomin vegna styrkingar á gengi íslensku krónunnar.

Enn er allt í óvissu hvort Landsmóti verði frestað eða ekki. Búnaðarsambandið hefur því ákveðið að framlengja skráningarfrestinn á kynbótasýninguna á Gaddstaðaflötum til þriðjudagsins 25. maí. Vonandi verður þá búið að taka ákvörðun um hvort og hvenær Landsmót verður. Hollaröðun mun að öllu óbreyttu ekki verða birt fyrr en föstudaginn 28. maí. Röðin verður birt á heimasíðu Búnaðarsambands Suðurlands www.bssl.is . Búast má við breytinum á hollum dag frá degi, því fram að þessu hefur verið mikið um afskráningar á kynbótasýningar hér sunnanlands.

Reglugerð sjávarútvegs- og landbúnaðarráðherra, um markaðsfyrirkomulag við aðilaskipti á greiðslumarki mjólkur, tók gildi við birtingu hennar þann 17. maí sl. Í henni felst að komið verður á fót markaði með mjólkurkvóta sem Matvælastofnun starfræki. Verður markaðurinn starfræktur tvisvar á ári, 1. júní og 1. desember, og í fyrsta sinn 1. desesmber nk. Nokkur óánægja hefur risið meðal bænda vegna breytinganna. Telja þeir t.a.m. að þær eigi sér stað án nægilegs fyrirvara.

Dregið hefur úr virkni gossins í Eyjafjallajökli og gosmökkurinn hefur lækkað undanfarna daga. Það bendir til þess að verulega hafi dregið úr kvikuflæði miðað við lok síðustu viku. Mökkurinn náði í gær upp í um fimm kílómetra hæð og er kvikuflæðið talið vera vel undir 50 tonnum á sekúndu, að því er kom fram í stöðuskýrslu Veðurstofunnar og Jarðvísindastofnunar HÍ í gær. Þar sagði jafnframt að enn mætti búast við sveiflum í gosvirkninni með breytilegu gjóskufalli. Í gær féll töluverð aska innst í Fljótshlíð, einkum í Fljótsdal.

Fólk í atvinnuleit verður fengnið til aðstoðar á því svæði þar sem mestar búsifjar hafa orðið vegna öskufalls frá eldgossinu í Eyjafjallajökli.

Íbúafundur verður haldinn í íþróttahúsinu á Hvolsvelli í kvöld , fimmtudaginn 20. maí 2010 kl. 20.30. Farið verður yfir þróun eldgossins í Eyjafjallajökli, afleiðingar þess og stöðuna í dag. Þar munu eftirtaldir aðilar halda framsöguerindi og svara spurningum íbúa:

Gosvirkni í Eyjafjallajökli hefur heldur minnkað undanfarna daga sem getur bent til þess að kraftur í gosinu fari minnkandi. Þetta sagði Steinunn Jakobsdóttir, jarðeðlisfræðingur hjá Veðurstofu Íslands, á stöðufundi í morgun. Steinunn sagði að þar sem skyggni hefur verið slæmt sé erfiðara að segja til um gang gossins þó sjá megi á radarmyndum frá Landhelgisgæslu Íslands, að gosmökkurinn sé töluvert minni en að undanförnu. Samkvæmt þeim hafi hann farið niður í þrjá kílómetra í gær, þó svo hann hafi farið upp í sex til sjö kílómetra hæð.

Vegna eldgossins í Eyjafjallajökli hefur skapast óvissa um fóðuröflun á öskufallssvæðinu í sumar. Fyrirsjáanlegt er að talsvert viðbótarhey þarf inn á svæðið og því er nauðsynlegt að tryggja nægar heybirgðir fyrir haustið.
Sveitarstjórnir Rangárþings eystra, Mýrdalshrepps og Skaftárhrepps hafa falið Bændasamtökum Íslands og Búnaðarsambandi Suðurlands að afla upplýsinga um þá bændur sem eru viljugir til þess að selja gæðahey inn á áhrifasvæði eldgossins.

Margir kúabændur eru ekki alls kostar ánægðir með það ákvæði nýrrar reglugerðar sjávarútvegs- og landbúnaðarráðuneytisins sem bannar viðskipti með mjólkurkvóta fram til 1. desember n.k. Þeir kúabændur sem Búnaðarsambandið hefur rætt við telja þetta bann til þess fallið byggja upp spennu á kvótamarkaði sem leiði til hærra verðs á komandi kvótamarkaði. Þá komi þetta sér afar illa fyrir þá bændur sem sjá fram að að framleiða umfram greiðslumark á þessu verðlagsári sem er óvenju langt eða 16 mánuðir. Margir þeirra hafi hugsað sér að reyna að bæta við greiðslumark sitt vegna þess hve lágt verð fæst fyrir umframmjólk núna. Þá bindi þetta hednur þeirra sem ef til vill hafi hugsað sér að bregða búi eða hafa aðilaskipti á greiðslumarki. Margir vilja einnig meina að það að  heimila aðeins viðskipti með greiðslumark tvisvar á ári sé of lítið og kvótamarkað þyrfti að halda ársfjórðungslega.

Búið er að setja niðurstöður úr efnagreiningum á gróðursýnum teknum 10.-13. maí s.l. á vefinn hjá okkur. Flúorstyrkur var í öllum tilfellum hærri en þolmörk nautgripa og hesta og ofan við þolmörk sauðfjár í nokkrum sýnum. Hins vegar er bæði athyglisvert og ánægjulegt að útskolun ösku og flúors eftir 12 tíma rigningu er mjög mikil. Hins vegar er flúorminnkun á Raufarfelli frá fyrstu sýnatöku (2.400 mg/kg þurrefnis þann 3. maí) til þeirrar næstu (957 mg/kg þurrefnis þann 11. maí) að hluta vegna útþynningar því töluverð spretta var þessa viku en lítil úrkoma.

Svaðbælisá, sem rennur rétt við Þorvaldseyri undir Eyjafjöllum, flæddi yfir bakka sína í morgun. Í samtali við ruv.is segir Ólafur Eggertsson, bóndi á Þorvaldseyri, að eðjuflóð hafi byrjað um kl. 9 í morgun, en farvegurinn var fullur af aur eftir fyrsta fljóðið í upphafi goss. Ekki hafa orðið teljandi skemmdir á vegamannvirkjum en að sögn almannavarnadeilda ríkislögreglustjóra fór vatn yfir varnagarða á 150 metra kafla.
Talið er að aurflóðið megi rekja til þess að gjóska, sem legið hefur á jöklinum neðan 1200-1300 metra hæðar, hafi flotið fram og hreinsast af 4-5 km2 svæði. Við úrkomuna í nótt hefur gjóskan orðið vatnsósa, fengið eiginleika vökva og flætt fram sem grautur af ösku og vatni.

Fyrstu skipulögðu fjárflutningarnir af öskufallssvæðinu fóru fram í dag þegar fé var flutt af fjórum bæjum undir Eyjafjöllum austur að Þverá í Skaftárhreppi. Um 110 ær með lömbum voru fluttar í girðingar sem Búnaðarsambandið hefur fengið til umráða til þessara nota. Fleira sauðfé verður flutt á næstu dögum en undir Eyjafjöllum og í Mýrdal eru rúmlega 10 þús. fjár á vetrarfóðrum.

Hollaröð á héraðssýningu kynbótahrossa á Sörlastöðum sem fram fer 25.-27. maí n.k. er komin á vefinn hjá okkur. Hægt er að skoða hana á upplýsingasíðunni um kynbótasýningarnar 2010 sem velja má hérna hægra megin á forsíðuni. Einnig er hægt nota tenglana hér fyrir neðan.

Breytingar á lögum um Bjargráðasjóð og búvörulögum vegna eldgossins í Eyjafjallajökli voru samþykktar með öllum greiddum atkvæðum á Alþingi nú fyrir skemmstu. Frumvarp þess efnis var lagt fram í síðustu viku og hlaut það flýtimeðferð í þinginu. Full samstaða var um málið í sjávarútvegs- og landbúnaðarnefnd og sömuleiðis í þinginu. Enginn kvaddi sér hljóðs um frumvarpið í annarri og þriðju umræðu utan Atli Gíslason sem kvaddi sér hljóðs um atkvæðagreiðsluna. Atli þakkaði þar fyrir þá miklu samstöðu sem um málið skapaðist og fyrir það hversu fljótt var hægt að afgreiða málið en beita þurfti afbrigðum við þingsköp til þess. Þá þakkaði Atli fyrir þann samhug sem fólki á áhrifasvæði gossins væri sýnd.

Sjávarútvegs- og landbúnaðarráðherra hefur undirritað reglugerð um markaðsfyrirkomulag við aðilaskipti á greiðslumarki mjólkur á lögbýlum (kvótamarkað) og einnig reglugerð um breytingu á reglugerð nr. 648/2009, um greiðslumark mjólkur á lögbýlum og greiðslur til bænda frá 1. september 2009 til 31. desember 2010. Samkvæmt reglugerðinni er Matvælastofnun falið að starfrækja kvótamarkað með greiðslumark mjólkur, sem á að halda tvisvar á ári, 1. júní og þann 1. desember ár hvert. Þá eru viðskipti með greiðslumark nú stöðvuð tímabundið eða fram til 1. desember n.k.

Þjónustumiðstöðin að Heimalandi vill minna á áður auglýstan fund í kvöld kl. 20:30 fyrir íbúa í Rangárþingi eystra á vegum sveitarfélagsins í félagsheimilinu Heimalandi. Fjallað verður um stöðu mála vegan eldgossins og úrræði rædd.
Þjónustumiðstöðin að Heimalandi er opin milli kl. 11:30 og 13:30 mánudaga, miðvikudaga og föstudaga. Þjónustumiðstöðin í Vík í Mýrdal er opin milli kl. 11:30 og 13:30.

Á þriðja hundrað fjár var flutt frá öskufallssvæðinu undir Eyjafjöllum í gær, nánar tiltekið frá Hrútafelli. Hrútafell er á því svæði sem orðið hefur hvað verst úti hvað öskufall snertir. Sauðféð, á annað hundruð fjár með lömbum, var flutt vestur í Mosfellsdal sem þýðir að féð á ekki afturkvæmt enda um flutning yfir sauðfjárveikivarnarlínur að ræða.
Á morgun verður svo hafist handa við að flytja sauðfé austur á bóginn af öskufallssvæðinu. Búið er að útvega beitarlönd á Þverá á Síðu og síðan er verið að yfirfara og endurbæta girðingar um landgræðslusvæðið á Leiðvelli. Því ætti að ljúka á allra næstu dögum. Hjá Búnaðarsambandinu er áfram unnið að því að útvega beitarlönd.

Í kvöld mun landbúnaðarráðherra funda á Selfossi með hluta samráðshóps ráðuneytisins vegna eldgossins í Eyjafjallajökli. „Ljóst er að eftir því sem að eldgosið og tilheyrandi öskufall dregst á langinn er mögulegt að grípa þurfi til mun umfangsmeiri aðgerða vegna landbúnaðar á svæðinu en áður var talið. Sérstaklega þarf að skoða stöðu sauðfjábænda þar sem að sauðburði er víða að ljúka en allt fé enn á húsi sem ekki getur gengið til lengdar. Bregðast þarf strax við þessari stöðu sem upp er komin,“ segir í tilkynningu.

Nú þegar sauðburður stendur sem hæst á öskufallssvæðinu og þrengsli eru víða orðin mjög mikil er mikilvægt að gæta hreinlætis svo sem nokkur kostur er. Víða er allt mögulegt húsnæði nýtt til hins ítrasta, hlöður sem og annað tiltækt húsnæði. Við slíkar aðstæður getur þurft heilmikinn undirburð og sem betur fer er til nógur hálmur á svæðinu.
Búnaðarsambandinu er kunnugt um að í Drangshlíð eru verulegar birgðir af hálmi og kostar hálmrúllan kr. 4.500 án vsk.

Dagana 11. og 12. maí fóru rúmlega 20 héraðs- og landsráðunautar ásamt fleirum í heimsóknir á 120 bú á áhrifasvæði eldgossins í Eyjafjallajökli. Tilgangurinn var að ræða við bændur og m.a. meta með þeim aðstæður og þörf fyrir aðstoð vegna fóðuröflunar og beitar í vor og í sumar. Úrvinnslu gagna er ekki að fullu lokið úr ferðinni en niðurstöður ættu að liggja fyrir í byrjun næstu viku.
Sú staða sem uppi er á svæðinu er mörgum bændum erfið. Öskufall og rykmengun hefur haft veruleg áhrif á daglegt líf og erfitt hefur reynst að sinna búskap með viðunandi hætti. Þó má segja að almennt séu bændur staðráðnir í að halda sínu striki eins og kostur er þrátt fyrir erfiðar aðstæður. Í samantekt ráðunauta kemur fram að fóðurbirgðir eru nægar á svæðinu og eiga að duga í nokkrar vikur hið minnsta. Engin leið er að sjálfsögðu að segja til um þróun mála því allt veltur það á goslokum.