Innan við helmingur kvígnanna sæddar

Tekin hafa verið saman gögn úr skýrsluhaldskerfi nautgriparæktarinnar, Huppu, hvað sæðingar á kvígum varðar hér á Suðurlandi. Á árunum 2008-2010 voru settar á 11.650 kvígur til endurnýjunar á kúastofninum eða 3.883 á ári að meðaltali. Þetta er í takt við það að hver kýr endist í um 3 ár til jafnaðar. Af þessum 3.883 kvígum sem eru settar á hvert ár voru 1.848 sæddar á árinu 2010 og 1.669 á árinu 2011 eða 1.759 að meðaltali. Það þýðir að aðeins 45% kvígnanna eru sæddar. Að meðaltali voru sæddar kvígur á 176 búum af um 250 búum hér á Suðurlandi. Það voru því sæddar 10 kvígur á hverju búi til jafnaðar árin 2010 og 2011. Á nokkrum búum eru allar kvígur sæddar, á töluverðum hluta búanna hluti kvígnanna en á alltof mörgum búum eru kvígurnar ekki sæddar.

Mikill munur er milli sýslna hvað þetta varðar eins og sjá má í töflu 1.

Tafla 1. Yfirlit yfir sæðingar kvígna 2010-2011.
Sýsla	Meðalfjöldi ásettra kvígna á ári 2008-2010	Meðalfjöldi sæddra kvígna á ári 2010-2011	Hlutfall sæddra kvígna af ásettum	Meðalfjöldi búa með kvígusæðingar 2010-2011	Sæddar kvígur per. bú á ári 2010-2011
A-Skaft.	192	83	43%	6	13,8
V-Skaft.	326	88	27%	21	4,3
Rang.	1.331	441	33%	56	7,9
Árn.	2.034	1.147	56%	93	12,3
Samtals	3.883	1.759	45%	176	10,0

Eins og glöggt sést er Árnessýsla eina sýslan þar sem meira en helmingur ásettra kvígna eru sæddar en hlutfallið er lægst í V-Skaftafellssýlu eða aðeins 27%.