Mjólkurframleiðsla á Suðurlandi

Eins og sjá má á meðfylgjandi mynd er veruleg aukning í mjólkurframleiðslunni á Suðurlandi sem og landinu öllu á þessu ári. Í síðustu viku var innvigtunin 1.070 þúsund sem er um 109 þúsundum meira en í sömu viku fyrir ári. Á landsvísu er framleiðslan um 2,8 milljónir lítra í sömu viku sem er aukning um 8 % miðað við fyrra ár. Það er í febrúar sem framleiðslan nær milljón lítrum á viku og svo nær hún hámarki í viku 22 eða seinni hlutann í maí. Toppurinn helst lengur en síðustu ár sem segir okkur að bændur reyni að láta mjólka sem mest, en ekki veitir af. Í söluyfirliti SAM kemur fram að sala á fitugrunni sl. 12 mánuði sé 124,9 milljónir lítra sem er 7,4 % aukning frá árinu á undan. Sala á próteingrunni er 118,9 milljónir fyrir sama tímabil sem segir okkur að það er helst vöntun á mjólkurfitu. Fituprósentan er hægt en sígandi að vaxa þessar síðustu vikur en er samt lægri en sömu vikur og í fyrra. Það er mikilvægt að nytin haldist sem best í kúnum og þarf því að huga vel að beit og gefa hámjólka kúm gott fóður með beitinni og þá ekki síst ef um rigningatíð er að ræða.