Niðurstöður efnagreininga á gróðursýnum

Greind hafa verið sýni sem tekin voru á völdum bæjum á öskufallssvæðinu 25. maí 2011. Mælingarnar fóru fram hjá Landbúnaðarháskóla Íslands en mælt var flúor F, kalsíum Ca, magnesíum mg, kalí K, natríum Na, fosfór P, brennisteinn S og járn Fe. Grassýni voru tekin í Öræfum, Fljótshverfi, Síðu, Landbroti, Meðallandi, Skaftártungu og Álftaveri (sjá töflu).
Flúorstyrkur var í öllum tilfellum langt fyrir neðan þolmörk sauðfjár eða á bilinu 2-21 mg/kg F þurrefnis en þolmörkin eru 70-100 mg/kg F þurrefnis. Þetta er einnig vel undir þolmörkum nautgripa og hesta sem eru 30-40 mg/kg F þurrefnis. Járnið er frekar hátt. Líklega er einhver skekkja í sýninu frá Snæbýli þar sem járnið er miklu hærra þar miða við hin sýnin. Hvað hin efnin varðar þá getur áburðargjöf haft áhrif á niðurstöður gróðursýnanna en miðað við þessar niðurstöður þá ætti askan að hafa jákvæð áhrif á gróðurinn.
Þann 14. júní síðast liðinn voru tekin gróðursýni á eftirtöldum bæjum; Kálfafelli, Kirkjubæjarklaustri, Fagurhlíð, Austurhlíð, Ytri-Ásum og Herjólfsstöðum. Niðurstöður eru væntanlegar á næstu dögum.

Efnamagn í kg þurrefnis