Sæði í 18.440 ær sent frá stöðinni

Í dag var síðasti útsendingardagur á hrútasæði frá Sauðfjársæðingastöð Suðurlands en útsending hófst þann 1. des. s.l. og hefur því staðið samfleytt í 3 vikur. Að þessu sinni var sent sæði í 18.440 ær frá stöðinni sem þýðir að miðað við 70% nýtingu má reikna með að rétt tæplega 13 þús. ær hafi verið sæddar. Þetta er heldur minna en í fyrra og munar þar um 500 ám.
SIgurvegari vertíðarinnar ef hægt er að orða það svo er Hergill 08-870 frá Laxárdal í Þistilfirði en úr honum var sent út sæði í 1.715 ær. Skammt á hæla honum kemur Borði 08-838 frá Hesti í Borgarfirði með útsendingu í 1.700 ær og ekki langt undan er Sokki 07-835 frá Brúnastöðum í Fljótum með sæði í 1.685 ær. Af kollóttu hrútunum var mest sent út úr Stera 07-855 frá Árbæ í Reykhólasveit eða í 1.400 ær.
Pöntun úr einstökum hrútum var óvenju jöfn og nánast undantekningarlaust tókst að sinn pöntunum. Í heildina gekk sæðistaka mjög vel.
Sauðfjársæðingastöð Suðurlands þakkar sauðfjárbændum og öðrum fyrir ánægjuleg og góð samskipti og sendir sínar bestu óskir um gleðileg jól og farsælt komandi ár.